السلام عليكم ورحمة الله وبركاته
سبحان والحمدلله والله اكبر
اخباركم بنات ان شاء الله بخير
يارب يبارك لنا ولكم في شعبان ويبلغنا رمضان ويجعلنا من صوامه وقوامه وممن تعتق رقابهم من النار
بنات انا متضايقه ما ادري اللي اسويه صح ولا غلط انا عندي توام بنات الله يصلحهم هم البكر وانتقلو للمرحله المتوسطه وعندي بنت ثالثه في رابع ابتدائي وحريصه عليهم واخاف عليهم ومشدده عليهم في اشياء كثيره كل ماقالو نبي كذا اقول لا مافيه مو حلو عشانكم ماراح يفيدكم يعني مثلا اشتريت لهم بلاك بيري لانه كل البنات اللي معاهم عندهم وبنات عمانهم وخوالهم وما اقدر امنعهم بس حددت لهم ساعات في اليوم بعدين اخذ منهم لانه الله يهدي البنات تعرفون ينامون عليه الوحده يروح عقلها تنهبلين يالله ترد عليك ويالله تقوم تساعدك واشيك على جهات الاتصال اللي عندهم وانا برا السعوديه متغربين وماعندي شغاله ومقسمه عليهم شغل البيت ابيهم يساعدوني يعني اللي تنظف غرفه واللي تنظف صاله واللي تنظف شي ثاني ابيهم يطلعون شقرديات ما ابيهم خاملات الحين عامله لهم جدول اسبوعي يوم طبخ ويوم مواهب يعني رسم وشي مثل كذا ويوم حفظ قران ويوم لهم نوديهم المكان اللي يبونه ويوم لنا احنا نوديهم للي نبي ويوم نتفرج على فيلم للي في سنهم بس المشكله انه طلباتهم ما انفذها لاني احس انهم يطلبون اشياء مو مفيده يعني مثلا اقولكم
يبون ملابس قصيره ومدري ايش اقول لا حرام ويقولون البنات اللي في سننا يلبسون كذا اقول ما ابي ادخل النار حرام وهم بلغوا جاتهم الدوره يعني لازم يتحجبون وجننوني هنا مايتحجبون طبعا ابوهم من يوم تغرب وهو متاثر عادي عنده مايتحجبون حتى انا يقولو مو لازم تلبسين عبايه البسي عادي وتحجبي ولو طاوعته تفصخت الله يهديه هذي سلبيات الغربه وبعدين اشوف انا بنات ليبيات واردنيات وحتى سعوديات اصغر منهم وماشاء الله متحجبات وملتزمات بالحجاب واحاول اقنعهم ومو راضيين ولما نجي نطلع يسوون لي سالفه وحوسه وابوهم يجي يقول لا خلاص خليهم مالك شغل واقوله اوكي بس هم في ذمتك انا ماني راضيه
ومشدده عليهم في الصلاة واعاقبهم اذا ماصلو احرمهم من البلاك بيري ومن اشياء ثانيه واقومهم للفجر وهم يتضايقون وبعد حتى الصغيره اللي في ثالث معاها ايبود ومحدد لها ساعات في اليوم لانه دمااااار يلهيم بشكل مو طبيعي لو اخليهم على كيفهم مافكوه ابدا وجلسو لليوم الثاني وهم على هالبلاك بيري
وساعات احرمهم من التي في لاهم يقولون نبي نشوف برامج انا ماتعجبني يعني برامج فيها اغاني واستعراض وقلة ادب مثل برامج ام بي سي قود تالنت عرب ومدري ايش وافلام اجنبيه وكل شي اقول لا لاللاا واقولهم تفرجو على برامج مفيده على محاضرات علي شي يقولون احنا ماحنا عجايز العجايز هم اللي مايسمعون اغاني جنننوني
ومرات لما نجي نطلع ولا يكون عندنا مشوار يجون وين ملابسنا وين ووين وين شباصاتنا وين اكسسوارتنا اقولهم مالي دحل انتو كبار واعتمدو على انفسكم البسو انتو رتبو اشيائكم انتو
واذا ضاع شي ما ادوره معاهم اقول انتو اللي تدورونه انا مالي شغل هذي اشيائكم مسؤولين عنها حتى اللي في رابع تجنني لي جات تروح للمدرسه الانجليزيه تضيع اشيائها وتقول وين ووين وانا اقول رتبيها من الليل مالي دخل انا رتبي اشيائك وجهزي اشيائك بنفسك
لانه يوم كنا بالسعوديه وعندي شغاله كانو مسكينه الشغاله يجننونها جيبي وجيبي حتى المويه يطلبونها منها كانو مره معتمدين على الشغاله لدرجة انه وحده فيهم قالت خلاص مابي مدام هذا بيبي شغل كثير وانا مالومها يجننون الواحد انا جايبتها لضف البيت وبسسسسسسسسسسسسس
احيانا يجون يقولون ياربيييه وش هالعيشه كل شي لا مع العلم اني اشتري لهم احسن الماركات ويلبسون احلى لبس وامشيهم مطاعم وروحات وجيات والحمدالله ما اقصر عليهم بشي بس طلباتهم ماتعجبني احس انها تضرهم
وساعات يقولون عطينا مصروف نشتري لانفسنا واعطيهم بس يشترون اشياء ماله داعي احس انها تضرهم بصراحه جننوني وانا خايفه عليهم حتى في الانترنت اذا دخلو الماسنجر اشيك على اللي عندهم مره لقيت واحد يلغب عليهم على اساس انه بنت وكشفته وتضايقت وحرمتهم منه فتره وبعدين خليتهم يدخلونه
وهم عندهم عيال اعمامهم في سنهم واكبر شوي وكثير ماشاء الله وساعات الاقيهم ضايفيني عيال عمهم الشباب وانا اقول لا وش دخلكم فيهم ليه تضيفونهم وبالنسبه لاعمامهم وابوهم وحمولتي يعني عادي عندهم مايشددون يعني فري يخلونهم مع بعض وانا اتضايق اقول لازم في حدود بين علاقة ابناء العم وبناتهم حتى لوكانو لسى صغار ينخاف عليهم
بصراحه تعبت ساعات اتضايق لما مايساعدوني في البيت ولا يسوون اللي ابي اعاقبهم يعني مثلا وحده ماساعدتني في الغدا اخليها تغسل الصحون تبع الغذا كلها اقول لها عشان مره ثانيه تسمعين الكلام وهم يتضايقون ساعات احس اني قاسيه مدري انا قاسيه ولا وشفيني
مره واحد من عيال عمهم كلمته في الماسنجر قلت له انا مو فلانه انا امها قال سلامات وشفيها لايكون فيها شي بنتك قلت لا بس انا احب اتعرف على اللي عندها في المسن لاني اخاف عليها قال الله ياسلام ياليت كل الامهات مثلك ينتبهون لبناتهم
والله محتاره هل انا قاسيه ولا عادي
الأربعاء 3 أكتوبر - 23:23:44 من طرف روز الورد
موضوع: ساعدوني اخاف افقد بناتي